រាជធានីភ្នំពេញ៖ បើតាមសេចក្ដីប្រកាសព័ត៌មានរបស់រដ្ឋសភា ស្តីពីលទ្ធផលនៃកិច្ចប្រជុំរដ្ឋសភា លើកទី២ នីតិកាលទី៧ នាថ្ងៃព្រហស្បតិ៍ ទី២៥ ខែមេសានេះ បានបញ្ជាក់អំពីការសម្រេចសុពលភាពនៃអាណត្តិបេក្ខជនតំណាងរាស្រ្ត ២ រូប ក្រោមអធិបតីភាពសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ដោយមានវត្តមានសមាជិករដ្ឋសភាចូលរួមចំនួន ១០១រូប។ 

នៅក្នុងសម័យប្រជុំរដ្ឋសភា លើកទី២ នីតិកាលទី៧នេះ មានរបៀបវារៈតែមួយគត់ដែលត្រូវបានអង្គសភាអនុម័តគឺ ការប្រកាសសុពលភាពរបស់បេក្ខជនជាប់ឆ្នោតជាតំណាងរាស្រ្តនីតិកាលទី៧ ចំនួន ២រូបរួមមាន៖ 

១. លោក ចាប ម៉ុច ជាតំណាងរាស្រ្តមណ្ឌលខេត្តកណ្ដាល ជំនួសសម្តេចអគ្គមហាសេនាបតីតេជោ ហ៊ុន សែន ដែលបានសុំលាលែងពីតំណែង និងជាប់់ជាប្រធានព្រឹទ្ធសភា។ 

២. លោក ទេព សុធីរ ជាតំណាងរាស្រ្តមណ្ឌលខេត្តកណ្ដាល ជំនួសលោក ប្រាក់ សុខុន ដែលបានសុំលាលែងពីតំណែង និងជាប់់ជាអនុប្រធានទី១ នៃព្រឹទ្ធសភា។ 

អង្គសភាបានអនុម័តយល់ព្រមលើរបៀបវារៈខាងលើដោយសំឡេងចំនួន ១០២។ សម័យប្រជុំរដ្ឋសភា លើកទី២ នីតិកាលទី៧ បានដំណើរការចប់សព្វគ្រប់ និងប្រកាសបិទកិច្ចប្រជុំម៉ោង ០៨៖១៧នាទីព្រឹក ថ្ងៃខែឆ្នាំដដែល៕